ಬೆಳಗು

P51216-081339

ಅರಿಯದೊಲವು ಚಿತ್ತವ ಬಳಸಿ

ಬತ್ತಿದೆದೆಯಲಿ ಭಾವುಕತೆ ಬೆಳೆಸಿ

ಕಣ್ಣಪರದೆ ಮೀರಿ ಬರುವ ಹನಿಗಳು

 

ಮೌನ ಲೋಕವ ತಾನಾಗಿ ಆಕ್ರಮಿಸಿ

ಹೊಸ ಜಗವ ಕಿವಿಗಳಲಿ ತುಂಬಿಸಿ

ಚಿಲಿಪಿಲಿಯ ನಾದ ಮಾಡುವ ಹಕ್ಕಿಗಳು

 

ಹೊಸ ಜನುಮ ಪಡೆದ ಸಂತಸದಿ

ತನುಮನದಿ ಕಂಪನು ತಾ ಹೊಂದಿ

ಭಾವಜೀವಿಯ ಸೆಳೆದುಕೊಳ್ವ ಹೂವುಗಳು

 

ಸೋನೆ ಸುರಿದು ಜಗದಿ ಹರಡಿ

ತನುಮನದಿ ಕಂಪನು ತಾ ಹೊಂದಿ

ಭಾವಜೀವಿಯ ಸೆಳೆದುಕೊಳ್ವ ಹೂವುಗಳು

 

ಹೊಳೆ ಹೊಳೆವ ಕಿರಣ ಜೋಡಿಸಿ

ಹೊಸ ಬೆಳಕ ಜಗಕೆ ತೋರಿಸಿ

ನೋಡನೋಡಲು ತೊಳೆದು ಕೊಳೆಯ ರವಿ

 

ಮನವರಿತು ಮೆಲ್ಲನೆ ನೋಡಿದೆP51216-081454

ಹೊರಗಡೆಗೆ ಹೊಸದೇನೋ ಕಾದಿದೆ

ಓಂಕಾರನಾದವು ತಂಗಾಳಿ ಸೇರಿ ಬರುತಿದೆ

 

ನಸುಕಿನಲಿ ಎನ್ನನು ತೊರೆದು

ಕಂಗಳಲಿ ಬೆಳಕ ಸುರಿದು

ನಿದ್ರಾದೇವಿಯು ತಾನು ದೂರಸಾಗುವಳು

 

ಹಸಿನೆಲದಿ ಹರಡಿ ತಾನಿಂದು

ಹಸಿರಾಗಿ ನಗುತಲೇ ನಿಂದು

ಮನಸೆಳೆದ ಲತೆಮಲ್ಲಿ ಅಲ್ಲಿ ಕಂಡಳು

 

ಶರಧಿಯ ಹವಳ ಕಂಡಂತೆ

ಮಂಜುಹನಿ ಹೊಳೆದು ಬಂದಂತೆ

ಮಲಗಿಹಳು ಮಲ್ಲಿಗೆ ಅರಳಿ ನಗದೆ

 

ತಂಪುಗಾಳಿಗೆ ತನುವು ಮುದದಿ

ಮಂಜುಹನಿಗೆ ಮನವು ಅರಳಿ

ಅರೆಗಳಿಗೆ ದೂರ ಲೋಕಕೆ ಎಳೆದಿದೆ

 

P51216-081508ನಲಿದಾಡಿದೆ ತಿಳಿಯೆ ಎನಿತು

ಮಿಡಿಯುತಿದೆ ಕಂಬನಿ ಮೊಳೆತು

ಅರಿಯದಾದೆ ಏನು ಏನಿದು ಎಂಬುದನು

 

ತನುಮರೆತು ಭಾವವು ಬೆರೆತು

ಮುದುಡುತಿದೆ ಕಣ್ಣವೆ ನಡುಗಿ

ಸೆಳೆಯುತಿದೆ ಶಶಿ ತಾರೆಗಳ ಲೋಕಕೆ

 

ಏನಾಗುತಿದೆ ಎನಗೆ ಹರಿಯೇ

ಹೊಸತೇನಿದು ಮನದಿ ಅರಿಯೆ

ಬೆಳೆಯುತಿದೆ ನವ ಭಾವನೆ ಹರಡಿ

 

ನಡುಗುತಿದೆ ದೇಹವು ಕಡೆಗೆ

ಹುಡುಕುತಿಹೆ ಆಗಸದ ಎಡೆಗೆ

ಆವಾಹಿತನು ಮಧು-ಮಧುರ ನಾನಾದೆ

 

ತುಡಿಯುತಿದೆ ಭಾವ ಆ ಎಡೆಗೆ

ಬಡಿಯುತಿದೆ ಹೃದಯ ಕರೆಗೆ

ಓಗೊಡುವಾಸೆ ಆಗಿ ನೋಡಿದೆ ರವಿಯ

 

ಮೂಡಣದಲಿ ಏರಿ ಬರುವ

ಹೊಸದಿನವ ಆತ ತರುವP51216-081549

ಕೆಂಪುಓಕುಳಿ ಚೆಲ್ಲಿ ನೋಡಿದ ಭುವಿಯನು

 

ಹೊಸಜೀವನ ಇದೇ ಏನೋ?

ಕಣ್ಣತೆರೆದು ನೋಡೊ ಪರಿಯು

ಇದೇ ಏನೊ ಸ್ಪೂರ್ತಿ ದಿನದ ಆನಂದಕೆ

 

ತಂಪು ನೀರು ಮೊಗ ತೊಳೆದು

ಹನಿಹನಿಯೇ ಇಳಿದು ಹೋದವು

ಕಾಯುತಿಹೆನು ಮಲ್ಲಿ ಏಳುವ ಸಮಯಕೆ

 

ಮಾಮರದಲಿ ಕೂಗೊ ಕೋಗಿಲೆ

ತಿಳಿನೀರಿನ ನಡುವೆ ನೈದಿಲೆ

ಬಂದಿಹನು ಋತುರಾಜ ವಸಂತ ನಗುತ

 

ಕರೆಯುತಿವೆ ಎನ್ನ ಹೇಳಲೆಂದೊ

ಚಿಗುರುಗಳು ತಾವು ದನಿಗೂಡಿಸಿ

ಸವಿನೆನಪು ಅದು ಯಾವ ಜನುಮದೊ

 

ಹಸಿರೊಳಗೆ ಅಡಗಿ ಇರುವP51216-081559

ಶುಕಗಳೆರಡು ನೋಡಿ ಎನ್ನನು

ಇಂಚರದಲಿ ಮೋಡಿ ಮಾಡುತ ಸೆಳೆದಿವೆ

 

ನೀಲಾಕಾಶವೇ ಏನೆಂದು ಹೇಳಲಿ

ಸಾಟಿಯಿರರು ಯಾರು ನಿನಗೆ

ಎಂದಹಂಕಾರ ಪಟ್ಟು ನಗುವೆಯಾ ಕೇಳಿಲ್ಲಿ

 

ಎದೆ ತುಂಬಿದ ಎನ್ನ ಭಾವಕೆ

ಒಲುಮೆಯುತ ಪುಷ್ಪ ಮನಕೆ

ನೀನುಪಮೆಯೇ ಎನ್ನ ಮಧುರ ಹೃದಯಕೆ

 

ನಿನ್ನೊಡನೆ ಏಕೆ ಮಾತೀಗ?

ಮೌನವಾಗು, ಕೂಗಿ ಕರೆದು,

ಜಗವನೇಳಿಸಿ ಮೌನ-ಶಾಂತಿಯ ಕದಡದೆ

 

ಭಾರತಾವನಿ ನಾನೇ ಸಿಕ್ಕೆನೇ?

ಕಾಣಲಾರರೇ ಬೇರಾರು ನಿನಗೆ

ಒಲುಮೆಯೆಲ್ಲ ನನ್ನೀ ಹೃದಯದಿ ತುಂಬಿದೆ

 

ತೆಂಗು ತೂಗಿ ಬೀಸಿ ತಂಗಾಳಿP51216-081620

ಭಾವುಕತೆಯನು ತಂದು ಮಂದಾರ

ಸುಮಲತೆಯನು ತುಂಬಿ ಕಂಪನು ಬೀರುತಿದೆ

 

ಕಣ್ಣನರಳಿಸಿ ನೋಡೆ ಮಲ್ಲಿಗೆ

ಹಣ್ಣುಕಾಯಿಯ ತಂದೆ ಪೂಜೆಗೆ

ದೇವ ಆಲಯವು ನಿನ್ನ ಪೂಜೆಗೆ ಈ ಹೃದಯ

 

ಬೇಡದವನು ಎಂದೂ ಯಾರಲು

ಬೇಡುತಿಹೆನು ನಿನ್ನ ಸ್ನೇಹ

ಬಯಲಾಗದದು ದುಃಖ ಬಿಕ್ಕುತ ಕುಳಿತಿಹೆ

 

ನಾಕುದಿರುವ ಹೊಸ ಸಮಯ

ಅರಳಿರುವಳು ಮೆಲ್ಲ-ಮೆಲ್ಲಗೆ

ಮಧುರತೆಯನು ಹೊಂದಿ ನಗುವ ಮಲ್ಲಿಗೆ

(ನವೆಂಬರ್ 1997)

Leave a Reply

Your email address will not be published. Required fields are marked *