>
ಆತ್ಮಗುಣಾಭಿಮಾನಿನಿ,
ಹೀಗೆಂದು ಕರೆಯಲೇ ನಿನ್ನ?
ಯಾವ ಒತ್ತಾಯಕ್ಕೂ ನೀನು ಒಲಿಯುವುದಿಲ್ಲ,
ನಿನ್ನ ಹೃದಯದಲ್ಲಿ ಅರಳದಿರುವುದರ ಕುರಿತು
ನೀನು ಮಾತೇ ಆಡುವುದಿಲ್ಲ.
ಬೆಟ್ಟದಂಚಲ್ಲಿ ಕಾಡು ಮಲ್ಲಿಗೆಗಳರಳಿವೆ,
ಕಂಪಿಗೆ ಸೋತು ಸುತ್ತುತ್ತೇನೆ,
ಜೇನುಗಂಪು ಕಾಡಿನ ತುಂಬ ತುಂಬಿದೆ
ಅಲೆಯುತ್ತೇನೆ…
ಅಲ್ಲೆಲ್ಲೂ ನೀನು ಕಾಣುವುದಿಲ್ಲ.
ಈ ಹುಡುಕಾಟವೆಲ್ಲ ಲೀಲೆಯಂತೆ,
ಈ ಅಲೆದಾಟವೆಲ್ಲ ರೆಕ್ಕೆಬಿಚ್ಚಿ ಹಾರಿದಂತೆ.
ಇದೆಲ್ಲ ಸಂಭ್ರಮದ ಅಭೀಪ್ಸೆ…
ನನಗೆ ಗೊತ್ತು, ನೀನಿರುವುದು ನನ್ನಲ್ಲಿಯೇ ಎಂದು.
